مصــــور بتــــــــاع كلّـــــــــووو ..#kuwait

في سنة من السنين كنت مدير برامج في قناة فضائية خصصت للشعر النبطي
كان وجودي كما أسلفت سابقا وجود اعلامي للتطوير والتدوير
لاحظت ان ادارة القناة كانت ترفض البرامج الاعلامية بطريقه
سلسله جدا ودبلوماسية حتى لا تتعمد احراجي
كان من ضمن خطة التطوير توظيف بعض
الكوادر الفنية والتقينة


الأخوان الله يذكرهم بالخير
ماكانوا يعرفون يعني شنو قناة او اعلام ..
موظف كهرباء وإثنين عسكرييين وهمجة فلوس صارت قناة
المهم إن القناة تمشي على شريط المسجات حالها حال باجي القنوات
في ذيك الأيام من أربع سنين تقريبا هبت القنوات النبطية وشاعر المليون
فدشوا الأخوان المعمعة وبيوم  وليلة راعي الميتر صار إعلامي ...!!


مو مشكلة أنا شكو فيهم راعي ميتر كهربا 
راعي عربانة بـــّرد ( آيس كريم)؟
تصورت الناس تبي إعلامي
فكالعاده والله لا يقطعها من عادة موديتني بستين داهية ...
جيت من أقصاي وسويت جدولة وخطة إعلامية للتطوير
تفاجأت بقبول الخطة أول يوم ومن ثم تجاوزها من ثاني يوم


بعد أسبوع عرفت الأخوان ما فيهم طب موليه ...


نرجع للتوظيف بالسالفة ..


دوامي كان صباحي وكنت محتاجة مصور يصور الندوات برا !!
فماعندي مصور متوفر بطرق المخرج الي أهو المعد والمخرج والمونتاج والمذيعه ...
لأ هذي... لأ ..
لازم مذيعه شعر ومكياج ولبس فوق الركبه
وتكون حلماوية الصوت هبلاوية الطول ...
هم .. ما علينا .. أنا شكو ...


كانت ويانا مذيعه مسيكينه مو عارفه كوعها من بوعها
لا لغة ولا صوت ولا لباقة ولا حتى مظهر
وكل تصوير خارجي يعني مصاريف زيادة
في زحمة البحث عن مصور


المذيعه : ست فاطمة زوجي مصور ..
ام بدر: مصور شنو فوتغرافي ؟
المذيعه : لا والله مصور تلفزيوني وكان يشتغل بتلفزيون الكويت وتالي الوطن وتالي الراي والحي...
ام بدر: إي كملي والحين شنو ..
المذيعه : قاعد في البيت والحقيقيه أنا الي أصرف على البيت ...
( هني في ليت أحمر شب ممنوع الدخول للمهنية والحرفنه بس
أ م بدر : اوكي ما في مانع خل يجيني باجر على العشر ونص بالمكتب قبل لا أطلع قاعة سلوى اوكي ..
اوكي اوكي مع السلامة ...


صار ثاني يوم جيت للمكتب واستلمت البريد وقعدت أرتب للندوة في قاعة سلوى
صارت الساعة عشر وصلت المذيعه ويا زوجها ...


بما أنني أكره أن يخرج الانسان من بيته غير مهند فقد اعتبرت هذا من العرف والذوق واللباقة الاجتماعية أن يتهندم الشخص لدى خروجه من البيت 
لأن في بشر جدامه تحترم الذوق العام والنظافة


وامتعض من رؤيتي لشخص بالبيجاما ذاهبا الى المسجد 
أو السوق أو حتى إجتماع
لمجرد أنه الصبح وتوه قاعد من النوم ... شي عجيب !!؟


وصل الأخ المكتب لابس بيجامة سودة
هذي تبي شهقه ..  ..!! 
مثل اللي يبيله زقاره بسالفه خاثره بالديوانية ..ههه
 

طبعا جد أنا اتفاجأت وانصدمت وبيني وبينكم 
لاعت جبدي من قلة احترام الذوق العام
مابي أقول اني أخذت انطباع سيء عنه بسرعه لكن


( اتخدت شوي على قولة  أخوانا المصريين) 

عادة أحتفظ بالإنطباع الحسن عن الإنسان 
حتى لو أبدى سوء فعل فيما بعد عله يتراجع عنه ..
أما الإنطباع السيء لا أجعله  يتمكن مني 
لربما هذا الإنسان يكون ليس سيئا بطبيعة الحال 
أو ربما يكن كذلك كما حاستي السادسة تقول لي وهذا يترك للزمن وتصرفاته
التي لا تلبث أن تثبت ذلك بمجال لا يدعو الى الشك ...


المهم نرجع لصاحبنا
...
وين وصلنا ... إي لين دش وسلم وقعد الأخ على الكرسي جدامي
ام بدر : يا هلا حياك الله تقولي فلانه إنك مصور ..
المصور: يا هلا فيج اي والله اشتغلت مصور بتلفزيون الكويت وبعدين رحت الوطن وتالي الراي وبعدين رحت البوادي
..
أم بدر : ما شاء الله ما خليت شي بالكويت مسوي كعب داير على القنوات !
المصور: شسوي بعد اختلف وياهم وأطلع
..

  ( حجي البطاليـــة)

أم بدر: إنت على نظام المكافآت بتلفزيون الكويت مو ؟

(شكيت فيه ومصيبة حاط رجل على رجل
ووحده فيهم مكسورة ...
زين ياحظي مكسورة ريحها تالي عيش الدور
يا.. يوسف شاهين

المصور: إي كنت هناك جذي وبعدين رحت الوطن ..
أم بدر: الوطن عند منو عند أحمد والا جابر ؟
المصور : إي عند احمد .. بس ما عجبني الحال وطلعت
أم بدر: ما عجبك الحال لا بالكويت ولا بالوطن وتالي رحت الراي ؟
المصور: إي رحت الراي وقعدت هناك جم شهر
..
أم بدر : من اشتغلت وياه .. بالراي ويا بسام!!؟ 


بسام مذيع شكو بس بصيده أتحبل بعرف منو يعرف من التقنيين 
ما عرف يحدد أحد عدل إلا المذيعين اللي الكل يعرفهم حتى شغالتي
 
أم بدر: صح ما تنلام بس الي أعرفه الراي شوي متفتحه اكثر من الوطن ؟
والي أعرفه عدل أنك اإت الي تدش وتطلع من مكان لمكان ....
فسهل جدا تكون إنت السبب ..؟


المصور: لا طبعا  لاحظ وياي طبعا
أنا مو السبب أهم السبب ما يعرفون يشتغلون ؟
أم بدر: ماشي خليني وياك حبه حبه .. إنت شتعرف تسوي ؟
المصور : أعرف كل شي ...؟
أم بدر : شنو يعني كل شي ... تصوير وإخراج ومونتاج وميكس ومكساج ...
المصور: وفوق هذا جرافيكس ..
أم بدر: جرافيكس ؟ عندنا واحد تخصصه جرافيكس يشتغل 12 ساعة باليوم متواصلة
وإنت تعرف هذيل كلهم ويا بعض ؟

(ذكّرني بواحد يعرف بكل شي واهو تلش )

المصور: شنو الجرافيكس ما يبيله شي برنامج ونتوكل على الله !!
أم بدر: انت أكيد تقصد الجرافيكس دورات المعاهد هذي أم ربع صح ..
ما تقصد تخصص الجرافيكس الي ياخذون عليها
بكالاريوس ويقدمون عليها ماستر و
PHD !!؟
   
يا معود عدل بدل أبيه يغير رايه ويقنعني أبد مصمم مصطفى العقاد

المصور: ما يبيله شي .. أساسا لما اشتغلت بالتلفزيون محد يعرف يشتغل 
ولا أحد يعرف يشيل كاميرا ولا عندهم إحترافيه 
لا في الكويت ولا في الوطن ولا الراي خصوصا الكويتيين 
ما عندهم حرفنه التصوير وافشل مصورين
...!!
الحقيقة قال هالكلام وما ادري شنو شاف جدامه كردية ولا أفغانية علشان يسب الكويتين 
ويقلل من قيمتهم عندي ... 
وأنا بالذات دم ضروسي الي يذم الكويت ويتطاول على عيالها وعلى كفاءاتنا
فالأخ ما سوى شي غير إنه دقني سلف ..
وأقـــوّيه قفرا 
 أقويه تعني اذا غثنا قطو أو عتوي نبعده لمكان بعيد والقفرا مكان خالي
لكني أبي شوي أعطيه إرسال هوائي لكرة الطائرة وتالي بكبس فيه وسط الملعب لأنه غثني من الصبح
...
أم بدر:شوف يا أخ متعدد الاستخدامات والمزايا ..
أنا إنسانة أومن بالتخصص جدا
يعني أقولك أعد برنامج أقدم برنامج لكن ما أعرف أخرج برنامج ... أقدر أناقش في الأدب في السياسة والطب لكن ما أعرف بالشريعه ما تخصصت فيها ما عندي خلفية تكفيني للمناظره
...

لذا يا بتاع كلوو مسألة إنك مصور يعني كاميرا مان وتعرف بالاخراج والمكساج والمونتاج والجرافيكس فأعتقد إنت بحاجة لقلاص فيمتو متروس ثلج يهدي أعصابك
ويهدي المحصلة الشمولية لمواهبك ..

أما إنك تذم الكويتيين وتقول إنهم فشله وما يعرفون يصورون فهني أخالفك لأن الاعلام الخليجي كويتي بحت ومن الستينات الكويتين الي ماسكين الإعلام قبل لا والدك الكريم يشرفنا بالكويت والمصورين الي اشتغلت وياهم أهم الي ماسكين القنوات والتلفزيون وإنت بعدك بالابتدائي .. لذلك

لما تنكر فضل أحد أنصحك لا تنكره جدام واحد من أهله ... وأنت تعديت على أهلي بما لايليق فتقبل ما لاتطيق

وتفضل وقتك خلص وأخذ الباب وراك ...

طبعا طقته البوهه لأن هالكلام انقال بنفس واحد

طقت (ن) وحده على قولة ناصر القصبي فما تحملت حتى إنه يقعد دقيقه فأخذت أوراق وطلعت أنا من المكتب للدور الثاني عند أحمد جرافيكس . من البارح يشتغل !!

=========

الخلاصة

===========

* ليش الكويت ياكلون منها ويذمونها ...!!
* لا تجامل على حساب عملك ومبادئك أبدا انت الخاسر الأكبر هنا ...
* حاول تحتفظ ببرودة أعصابك أمام الجاهل والسفيه والأحمق واختصر الوقت واطلع
* وطنك ثم وطنك ثم وطنك .. لن يحافظ عليها غيرك حتى لو بكلمة
* المناصب الى زوال وبقاء الحال من المحال .. أمس مدير واليوم وزير وغدا سجين ..
* إربأ بنفسك عن سفاسف الأمور .. ولا تحاول إصلاح الكون مثلي ... محد يستاهل