خــلـك ريـــلاكـــس ... !!!

أعــــوذ بالله من شــر الشيطان الرجيـــم
بســــم الله الرحمـــن الرحيـــــم
بدون مقدمات ...
==========
خــلـك ريلاكـــس
:
:
اذا وقفت جدام قاضي والحكم لك وحكم ضدك بنفقه الف وقدره
خلك ريلاكس
واخذ بعضك واطلع لأنك مو قد القاضي عنده الضربة القاضية
:
:
:

اذا قاعد تكتب مقال وانحاشت بنات أفكارك بسرعه
خلك ريلاكس
وروح دورهم تحصلهم عند جارك
:
:
اذا دشيت فيلم ولقيته ما يسوى فلوسه
خلك ريلاكس
واقنع نفسك انك استمتعت بالخروج من المنزل وجنك بالريفيرا قص على روحك يعني
:
:
اذا نامت على سيارتك وحده تسولف بالتلفون ومو شايفتك
خلك ريلاكس
وانزل واخذ التلفون من ايدها وطقه بالأرض وكسره أحسن ما تكسر راسها خصوصا اذا ماخذ برميرا 20100
:
:
اذا عندك ياهلين بالبيت بس يتاجرون على اي شي وما وراهم الا الصداع
خلك ريلاكس
وروح من ورى بعضهم وعط كل واحد هدية وقوله انا أحبك أكثر .. ماراح يكتشفون الخدعة اذا حرصت عليهم انه سركم الصغير

على كتر /
عفلنقي (كلمة كويتية) تعني : ‏صفه تطلق ‏على الشخص سئ السمعه المتلاعب   

اذا سمعت خبر مفجع أو خبر محزن ومفاجئ
خلك ريلاكس

عادة يكون الخبر مفبرك او مبالغ فيه بشكل كبير والموضوع ما يستاهل
فما عليك سوى انك تمسك الي جابلك الخبر وترضه بالأرض
:
:

اذا تعاند وياك المدير ورفضت يعطيك تقرير امتياز وعطاه لغيرك الي ما يستاهل
خلك ريلاكس

ودور على (الـ) أو ( واو) من جماعتهم وأهو يضبطك بس اذا وصل الموضوع لشيك
أتمنى تكون تصوره بتلفونك علشان تطرشه لي بلوتوث .. :
:
اذا حسيت ان الانسان الي تحبه ما منه فايده ومزاجي ويوم وياك وعشره يدوج خلك ريلاكس

واكتب له مسج أتمنى عدم الاتصال لحلول زواجي ولأني رجل اقدس الحياة الزوجية ففارج ولا تتصل .. بعد دقيقتين بيدق عاد انت وشطارتك بالطماشة :
:

اذا صادفت ياهل بالسوق يتنطط من مكان لمكان وأزعجك في حدى المحلات خلك ريلاكس

وامسك الياهل من غولته وحطه بغرفة الملابس جود الأم تفقده واقعد اضحك
لا تنسى تعطيه حلاوة علشان لا يقول انك خاطفه ...
على كتر /
كلمة كويتية قديمة فشغى : ‏يقال مثال فلان ‏ماكل فشغي اي متعب ومرهق من الفقر او المرض او المصايب

اذا سمعت الكلمات الآتية انبطاحي - بصام - مرتشي - نائب - معارضة - أمن دولة - قوات خاصة - طراق خلك ريلاكس ... وافهم انك ان لم تكن معنا انت ضدنا فبندوس في بطنك جماعة .. وتالي نرفع العقال علامة النصر على كتر / كلمات كويتية قديمة يتزنكح : ‏يعني يمشى ببرود يتمطي في مشيته ‏مثال اشوفك ياي متزنكح اليوم   

اذا شفت واحد بالديوانية يتفرعن ويبين انه أسد على أهل بيته ومدوخكم بمغامراته في قمع المرأة واحتقارها وانها توقف لين يخلص وجبته الكواسرية

خلك ريلاكس

بس راقبه لما يوصله مسج من بيته او اتصال _ وينك في _ شوفه شلون يرد
خلاص خلاص الحين جاي ...
هني تقدر تضحك على سكانة مرته

**
*

اذا شفت واحد بالأربعين متعاون ويا واحد ثاني على شلة بنات يمثلون عليهم أدوار الحب
ويطالبونهم بفلوس لعجزهم المادي والبنيات فقارى يزخون من 300 وانت طالع خلك ريلاكس ..

واعرف انك في زمن المواطن المنتف أخلاقيا وقبليا وبيئيا ... وهذيل عاقبتهم وخيمة عند الله
واذا تقدر تحذر البنيات جزاك الله خير .. ترى طيور الظلام أحيانا تبي سيف ذو الفقار
**
*

اذا شفت مدرس مصري يدرس لغة انجليزية بشكل خاطئ لولدك او بنتك في درس خصوصي خلك ريلاكس

والراشدي الي ودك تعطيه له لازم انت تاخذه ... لأن مصر اولادها لا يتقنون الانجليزية عدى من درس في مدارس اجنبية أما مدرسين كفر الشيخ فوالله غلابه واحنا الي بلشنا عيالنا فيهم ...

**
*

اذا شفت موضوع لفاطمة حسين العلي يحمل هم قومي وكويتي وتسكر في الشبكة خلك ريلاكس
وتأكد انها مثل سمك السلمون تمشي ضد التيار وبتفتح موضوع أجمل
**
*
على كتر /
كلمة كويتية قديمة قنزوعه : ‏عباره عن انه هناك بعض الفتيات ‏ قديما بالكويت اللى شعورهم فلافل اللى شعورهم جدائل فتكون شبه منتصبه ‏فاسمونهم الناس قبل ام القنازع

اذا طرى على بالك انسان او حلمت فيه وفجأة يالك منه اتصال او تصادفت وياه بأي مكان
خلك ريلاكس
لا تخاف ,,, انت مو مخاوي ... اهو نوع من انواع الحاسة السادسة تصير لذوي القلوب النظيفه جدا
يعني قلوب مغسوله بكلوريكس ... من اي داء (خبث- حسد-غيرة-مؤامرات)
**
*
لما يأذن هندي لصلاة الفجر وانت ودك تصلي صلاة خشوع وتضايجت من أذان المؤذن الي ما يعرف عربي
خلك ريلاكس ..
وتخيل انك تسمع الأذان بصوت الشيخ الطبلاوي او الشيخ الدليمي او حتى الشيخ الحذيفي الله يطول بأعمارهم
وروح صلاتك واترك همومك عند عتبة المسجد ...
**
*

الوالد الكبير او الأم الكبيرة بالعمر بركة في البيت لكن اذا وصل فيهم العجز انه ما يقدر ينهض ويصارخ وخاينته الذاكره
خلك ريلاكس
في يوم من الأيام كنت تتعلم المشي على ايدهم وتتعلم الكلام وكنت توصخ ملابسك والي حواليك بالأكل وكانوا يشعرون بالسعاده ...

**
*
على كتر /
زبوط النقعه : ‏هذا الوصف يطلقه الكويتين على ‏الشخص القصير ضعيف البنيه فيشبهونه بالزبوط والزبوط هو نوع من القواقع البحرية ‏الساحليه والنقعه هي ساحل البحر القريب

اذا انت راودتك أحلام كثيرة ومتكررة او كابوس

خلك ريلاكس

وابحث في حيثيات يومك ... حتما في شي غايب عنك وسط الهيصة الي انت عايش فيها

**
*

اذا عندك ولد مراهق وعنده بلاك بيري ويعس بالسوقه ويا ربعه ويالك بمصيبة بيوم

خلك ريلاكس ..

لازم يفهم ان كل شيء الكتروني له سلبيات وايجابيات ويا ليت تعطيه درس عملي

**
*

اذا قبلك بلاك بمحبة انسانة لكن الانسانة هذي ما تبي تدش بعلاقة
خلك ريلاكس

واتقبل وجهة نظرها مافي شي بالغصب
ولا تدش دعوم بعشرتعش مسج

**
*

اذا لقيت انسان تحترمه وله حظوه في مجتمعك لكن بعد فترة تغيرت اخلاقياته وتنازل عن كثير من المبادئ

خلك ريلاكس

طبيعة البشر متغيرة ومتقلبة وفي أنفس تعبد الدينار وتعبــــّـــد له طرق الدين


**
*

اذا انت حديث الزواج وكثيرة مشاكلك ويا زوجتك على الطالعه والنازلة ابعد شوي

خلك ريلاكس

لازم تفهم انك ما تقدر تربي انسانة من يد ويديد واصلتلك وفق تربية معينة يعني لا انت تغير فيها
ولا اهي تغير فيك لكن الوصول الى نقطة تواصل مطلوب ويبي شوية صبر
فطبيعة المرأة النفسية تختلف عن الرجل فاللي يحاول يغير زوجته
ابشرك .. تراك تدور الطلايب
على كتر /
هوله : ‏مثال انت يالهوله اي قبيح المنظر ولا يتسم بشئ من الجمال وينطبق ‏ذلك على الذكر والانثي
واحنا نقول على الي بتشبب وتترس اصابيعها خواتم وويها مكياج وتلبس لبس البزر يا هولة تهولي

سالفة مر عليها اسبوع بس تقرقع بقلبي
اذا صابك احباط من الاستقبال الوطني ل منتخب الكويت الوطني في استاد جابر ل 50 الف متفرج
بالفعاليات الي دوخنا فيها الأخ الي أعلن عنها بأنها مميزة وان دخول اللاعبين مميز والاحتفال مميز
عنبو غيركم منتخب وثلاث كؤوس ما غزر بعيونكم

تسوون احتفال مثل العالم والناس وباجي البلادين ...!!!
فرقة ميامي خلود وحمود وبشار الشطي ومايك مبلتع صوته مبحوح !!!
وجان زين الاتصال بين الاستديو والملعب تمام كل شوي منقطع !!
يخرب بيت الفلوس الي عندكم عندكم 3 ايام ما عرفتوا تدبرون شي زين
وفرقة السيف الي بليا غمد يغربلهم قلطه مو حافظين القصيدة
حضر يقصدون بدوي قمــة الفشـــل ... !!!

كل هذا بكووووووووووووووم

والجراغيات كوم ثاني لأن الي صار هذي مو العاب نارية ...
بمخيامتنا الشتوية نسوي ابلى من هالألعاب النارية الصاروخ 40 دينار نشتريه !!!

ليمتى ليمتى ليمتى ليمتى يا كويت

تتوقع هالاحتفال بقطر والا بالامارات شلون بتكون الفعاليات
انا بفهم احد منكم شاف فعاليات قطر من قبل والحصان الي صعد البرج ليه الشاره !!!
احد منكم شاف فعاليات برج خليفه ...!!
زين شفتوا احتفاليات افريقيا ...
زين اليمن ليش نروح بعيد ...

علامكم طاقتكم البوهه على طول ...

خـــلك ريــلاكس ..

كانوا طالعين بحركة طوق الورد الطبيعي ...!!! معذورين كانوا يشكون الورد !!
وادعي ياخذون كاس آسيا علشان ييبون رويشد يغني برجعتهم !!!
جود يونسون ل 50 الف متفرج الي ياي يرحب بالمنتخب بالبرد !!!

على كتر /
غبرا : كلمة كويتية قديمة تعني ردة فعل ممتعضة جدا من قبل النسوة


والله شي يفشـــــــــــــل ...

طالع مستانسين بأقواس التفافيخ مادري من اي معرض نسائي متسلفينهم 

 

 اذا خلص تأمينك اليوم وناوي باجر تسوي التأمين ... وفجأة صارلك حادث لا قدر الله ..
خلك ريلاكس ..

واعرف ان هالشي لا تتهاون فيه خصوصا اذا سيارتك يديده من الحفيز ..
وان هالدرس يعلمك ان في حياتك أولويات ...
**
*


اذا عندك ياهل في البيت يتأتأ وما يعرف يسولف بشكل طبيعي لا تتضايج
خلك ريلاكس ...
وحاول انك تعلمه بهدوء وأفضل علاج للتأتأه تعلمه سورة الصمد لوجود أحرف المد فيها فستعطيه
قدره على تمديد الأحبال الصوتية بشكل سلس .... جرب وادعيلي
**
*


اذا دشيت محاضرة ولقيت ان المرجع الخاص بالمحاضرة مو موجود والدكتور حده ما يغشمر
خلك ريلاكس
فرصة تعرف قوة ذاكرتك من خلال الشرح ... واذا انت متابع والا مقزرها مسجات ونكت بالمحاضره
**
*


على كتر /
خاوط : ‏فلان يخاوط في ‏السكيك يعني يمشى على غير هدي وعن غير قصد او بالاحري يذهب من طريق ويأتي من اخر من ‏دون هدف  

لما يكون عندك مراهق وزاعجك في عدم الدراسةواهماله الواجبات وتلاقيه يعس بين اللابتوب والبي بي والطلعات

خلك ريلاكس

واقعد معاه قعدة مراهقين وحاول تفهمه ان لكل شي وقت وانك ماراح تكون موجود علشان تنفعه بعدين
فلازم ينفع نفسه ... اذا سمع كلامك زين على زين
تعفنق وما سمع الحجي ورد لطبايعه .. روح لسوق رامز واشتري كلينكس بخمس دنانير وعطهم له ووقفه على خط الصبيه او الجليعه وخله يبعيهم او تقدر تشكل بين الرقي والطماط واليوسف أفندي وهالأيام الكستنه هم خوش مشروع ... !

مصيبه اذا عجبه المشروع وقالك ابي استمر فيه وأهد المدرسة ..!!!!

. هني لازم تبلغ عليه البلدية علشان يعرف القانون ....!!

على كتر /

امزهلق : ‏اي مرتب ومنمق يعني اذا كان عندك شى قديم ونظفته وصار جنه يديد 

اذا انت من النوع الطيب وترافج على النية وتعطي من كل قلبك وتجي من أقصاك ولقيت الغدر من صويحب اعتمدت عليه

خلك ريلاكس ...

المشكلة فيك يا صاحبي ماهي في الناس .. الزمن تغير وما عاد ت الطيبه فعل ممدوح بالعكس أصبحت الطيبه مثال على السذاجة .. لا تتغير لكن حاذر يا وخيتك ولا تعطي سرك لأحد أبد ...

**
*

اذا انت انسان تحب اناقة المرأة وتحب المرأة تتزين وتكون كلاس والمرة الي عندك اقصى لبسها دراعة كودري
وتعاندك في طلبات اقصاها مكياج ولبس عدل

خلك ريلاكس

لا تزهق منها واخذها مشروع تحدي وسو لها make over اي تحويل من هولة لعسوله
طاعتك زين على زين وعجبها الحال
ما عجبها الحال وفسقت وطلعت بطرانه ... مثنى وثلاث ورباع ...
بترجع واهي خوش آدمية


**
*

اذا انت من أسرة التعليم وشايف ان الطلبة عندك ما تستجيب لوجودك ولا لجهدك ومطفرينك
خلك ريلاكس
اترك عنك عصا ملا صالح واسلوب التهديد وجنك تحاجي رفيجك بالسكة ... ببساطة
احترم الطالب يحترمك خصوصا اذا كانوا مراهقين ...
المراهق متى ما اشعلت فتيل الرجولة عنده صدقني بيبدع بشكل انت ما تتوقعه ...عن تجربة

**
*
اذا عندج خالة في البيت اقصد ام الزوج مرة كبيره وتلاقينها حرصيه على أغراضها وتعصب وماترضى على أشياء كثيرة منها الطباخ واللبس والمعاملة ويمكن تتدخل بعلاقتج ويا زوجج او حتى طريقة تربيتج لعيالج ...

خليـــــج ريــــلاكس

الحالة الي عندها ما جت صدفة ولا اهو طبعها بس هذا نقص بثلاث هرمونات تتعرض لها المرأة في الشيخوخة وتبدأ مرحلة العصبية واستنكار الحاضر واستحضار الماضي ويكون التعنيف هو اسلوبها المفضل ..يعني بالكويتي يـــا (جنـّــه اسمج خالــه ) يعني بتعيشين نفس مرحلتها بيوم من الأيام
والمرة الكبيره في البيت بركة ما بعدها بركة ...

**
*

على كتر/
ادنات الدون : ‏بمعني ‏أقل القليل فيقال عن الطفل كثير البكاء حمووودي يبجي على ادنات الدون اي على اقل ‏سبب

اذا قابلت شخص (رجل - امرأة ) ترك عنه الحياء واستعان ببذاءة اللسان واستخدم اشنع العبارات على الملأ وكنت معه في مواجهة

خلك ريلاكس

ابتعد فورا عن مكان تواجده مجرد تواجدك يسئ لأخلاقك الرفيعه .. لأن من ينتهج هذا النهج
سهل جدا أن يستعين بكل لفظ تتعفف منه مسامع الصالحين حتى يطال منك ..
لذا البعد عن هذه النوعية من منتهجي الانحطاط أكبر غنيمة وهي حفظ الذات


**
*

اذا صادفك شهر طلعت عليك اقساط ومخالفات وتجديد جوازات الخدم واقامات واقساط مدارس
واقساط جامعه بالاضافة لقسط البيت ولقيت نفسك بين فكي كماشه

خلك ريلاكس

لا تحاول تسدد الأقساط دفعة واحد يعني قسط 200 دينار سدد منه 150 فيتبقى لك 50 دينار
وهكذا في هذا الشهر العصيب وفي الشهر الثاني حاول قدر الامكان ان تضع استقطاع شهري قسري لك
قدره 20 دينار فقط لاغير وانساهم ...
في يوم ستحتاج هذه 20 التي قد تصبح 2000 او اكثر ...

**
*

اذا واجهت موقف استنفذ اعصابك وانت من النوع الحمقي والي ما تمر على خشمك الذبانة .. على قولتنا

خلك ريلاكس

المثل الي قول لا ينطلك عرج ..ترى صحيح ..

وهنا يقصد فيها ارتفاع الضغط الدموي يعني ما تسوى يرتفع الضغط او السكر او تكون ضحية هالمرضين وانت بعد صغير وشباب ... وحاول تتنفس بهدوء
او اطلع من المكان الي انت فيه يعني لا تسوي نفسك ابو العناتر وتبي تواجه وآخرتك انت الي بتنطق ..
اطلع اوقف على البحر اقعد عشر دقايق شهيق وزفير قوي اليود يدش جسمك وبترتاح ...

**
*

على كتر/

غميضة : كلمة نسائية كويتية تعني وا أسفي ... حسافه غميضة ...

اذا طحتي على زوجج يكلم أو حتى في انثى ثانية بحياته وفلوسه رايحه عليها كروت ومكالمات والذي منه ...... لا تروحين بيت اهلج وبكشتج سابقتج !!! 

  خليـــــــج ريــلاكـــس

ابتعدي عن غباء النساء وعنجهيتهم والغرور والغيرة العبيطة الي تهدم بيوت ... لأن الي تطيرينه من ايدج في 12 غيرج يتلـّونه وفق اخر دراسه لابراهيم الفقي لذلك عزيزتي اخذي نفس واهدي وعالجي الموضوع بحكمة ... ترى الريال الطلاق عنده ببيزة يعني مو فارقه معاه في غيرج وايد والجو الي وياه اولى بلحظات السعاده والحياة الأسرية الي انتي بتهدين كل شي فيها وبتخلين تعبج تستولي عليه وحده يديده بارده مبرده زوجج عاجل وما يحب الفضايح وانسان محترم اعتبريها نزوة وقعدي تفاهمي وياه عن سبب فراقه لج ودخول انثى ثانية وبالهدوء تقدرين تكسبين احترامه وتسحبين الأولي والتالي يعني شلي قاصره شلي مو عاجبه فيج شلي يبيه في المرأة اهو له مكانة مقدسه عندج والي اهو وكوماري واحد .. وتسجلين لج 10/0 لأنج هني الجمتيـــه بكرم أخلاقج وأدبج وتفهمج الي ماراح يحصله عند اي انثى أخرى .... زوجج بايعها ومو فارقه وياه فمن له حيلة فليحتال وهني نستخدم الطرق الملتوية والي مو عارفه الخطة تراسلني ع الخاص افهمها شتسوي علشان يرجع ابو عيالها لها ... وبكلا الحالتين اهي الكسبانة ان طيرها ما يطير ولا يولف على غيرها .... على كتر/ تفنتق / يعني يأتي بشيء جديد كليا كالاكتشاف فنقول فلان يتفنق او عنده فنتق يديد . 

اذا كنت ماشي بشارع مزدحم وحصلت يمك شارع اقل ازدحام ودخلت فيه ... وفجأة لقيت الشارع الي تركته مشى طبيعي وانت انحكرت بزحمة الشارع اليديد

خليك ريلاكس

وتأكد ان الشارع الي انت ماشي فيه بيمشي بكل الأحوال فماله داعي التبتون بين السيارات لأن يمكن هالدقيقة الي تدورها بين السيايير تسببلك حادث غير متوقع ...


**
*

اذا اعترفت لشخص انك تحبه واهو ما بادلك الاعتراف وحب انه ياخذ وقته علشان يحس باللي قلته
خلك ريلاكس
الطبيعي اهو والغير طبيعي انت ... لأن بيحاول يستوعب الي انقال ويقيسه على عدد المواقف .. انت الي عارض حب والحب ما ينعرض ولا ينطلب يجي فجأة لطرفين على استعداد للاعتراف فيه ...

**
*

اذا شفت جماعة يتكلمون انجليزي ويا عربي وانت ضايع بالطوشه ...
خلك ريلاكس ...
واتعلم ثلاث كلمات شكرا ,,من فضلك ,, انا اسف thanks _plz - sorry

على كتر/

انفتق / هو ما شق من الملابس .. فنقول انفتق ... 

اذا شفت نفسك متأخر على الدوام ولازم تطلع وطلعت ومسكتك الزحمة وعلى ما خلصت الزحمة طلعت وفجأة طق عندك بنجر .. وعلى ماصفطت على حارة الأمان بغى يشيلك واحد ياي مستن على حارة الأمان...
ودقيت على الونش فشال السياره لأنها يديده فواحد ولد حلال فيش بالونش وطاحت سيارتك بالشارع وفيش فيها الي وراه .... ارجووووك هدي ...

خلك ريلاكس ...

المسألة ومافيها انك منحوس وبجداره ... روح أقرى على نفسك
ومصيبة اذا تأمينك مخلص .. انصحك بحبوب مهدئة لمدة اسبوع  

اذا حاول أي أحد ان يمارس عليك وصاية فكرية أو حتى اقصاء فيما تكتب
خلك ريلاكس
وقل له لك فكرك ولي فكري فلا تقل لي أف ولا أقل لك تبا ...
راح يفهم الباجي


**
*

اذا لقيت نفسك تكتب موضوع ودش عليك واحد عرض ويحاول يقلل من شأنك وشأن قلمك
خلك ريلاكس
رد عليه بأدب جم يحرجه ومن ثما راقبه حتما بتلاقي عليه ثغرة بأحد مواضيعه
ساعتها تقدر ترد له الصاع صاعين .... ووريني شطارتك

**
*

اذا شفت واحد كل مهمته في الحياة الفتنة بين الناس سواء بالوشاية او بالتدليس
خلك ريلاكس
وتكفى اخذه بكورنر ونام فيه ... ولا تنسى تصوره تدري بعد اثبات حاله

**
*
اذا لقيت عندك بالدوام وحده بالدوام جنها فارة طحين تطامر من مكتب لمكتب ومن اذن لأذن
تقلب الناس على بعض واذا عادت أحد لازم تلف علىنص الوزارة علشان يعادون الي معاديتهم

خلك ريلاكس

عطها / عطيها طاف وتجاهل من قلب واذا لزم الأمر
جيبي وياك سم الفيران او حتى مصيادة الفيران وحطولها جبنة جود تركد ...

**