الحقـــران يقطـــــع المصـــران

 

.الحقران يقطع المصران 

مثل خليجي قديم ..

مفاده الفسيولوجي ان الكبت والغضب يسبب ألم في الأمعاء وهو ما يسمى اليوم بالقولون العصبي ...
وهذا متعارف عليه ان الغضب والزعل يولد الام شديده بالبطن ....
لمن قبل هذا المثل وكيف يقال ومتى يقال ....
بنظري :

يقال إلى 

الزوجة الحنانة المنانة المتطلبه ....
يعني اهي الزوجة اللي ما تبطل طلبات
فلانه عندها وانا ما عندي اشمعنااا ويا تخصر شوي
علانة سافرت باريس وشرم وجينيف وزيلمسي وهاواي وانا لا
علتانة كاشخة بانفينيتي ( مو الي ريلها باق الجمعية ...وحده ثانية) قمرديني وانا ماعندي
شلتانة كاشخه بساعة ب6000 دينار وانا ساعتي تقليد ام 20 دينار
وجناطها كلها اصلية وانا اييبهم من سرداب الشايع ... على 10 دنانير
حلتانة ترقت وانا بعدني ماعندك اهل ما عندك واسطه ما تحبني ما تبيني لو تبيني رزيتني وعزيتني ,هذيل الرياييل شوف شيسوون لحريمهم
مسوين الهوايل حتى بوق قاموا يبوقون .. وانت قاعدلي على النت مجابل البالتوك والشبكة الوطنية ...أووو مقص الرقابة !!

هذي نماينها وايد ميوت على الخفيف
وحقران يقطع المصران و جنك ما تدري ...
سوى الي عليك واللي يرضى ربك وامش دربك تركواز ...

حقران يقطع المصران يقال الى

الزوج البليد والمتذمر والشكاي وراعي العجرة ...
( اسقاط مو صج)
هذا الزوج اذا طلع وياها السوق,, شنو تبين تشترين من السوق تدرين هالمارينا زحمة هالحزة,,
وكلها مصابن ماراح ناخذ راحتنا شرايج نروح الفنار نتمشى ونتشرى ( بالاشاره )
والا اقولج شنسوي بالفنار اسعاره نار واحنا ما عندنا اذا عندج بيزتين خشيهم ترى مادفعت اقساط سيارتي تدرين نروح سوق شرق احسن رخيص وقريب واهدى شوي من افتحوا الأفنيوز والكويت كلها تتكود هناك خل نتمشى هناك ونتعشى ...

صوب سوق السمج غير رايه

والا اصلا مافيه مطاعم بطرق كنتاكي وبيرجر كينج الله يزيد النعمه اكلهم ما ينوكل يبا تدرين بدربنا نروح المباركية احسن لنا
مافي احلى من سوق الحجية نتشرى اغراض يعني شتبين دراريع شفيها دراريع المباركية الله يرحم خام الكريشه والكودري صار حرير ولينين وستان
نقعد هناك بالمطعم قعده شعبيه احسن لنا

__ صوب السرداب والمصافط -

اصلا حتى سوق المباركية خربوه بالله هذي مطاعم تنحط طاولة يم طاولة يعني شلون تاكل الحريم ..قولي انج بتاكلين هني .. اكسر راسج بعد هذا الي باجي حريمنا تاكل يم الرياييل وتتعلج باللقمة تدرين عاد على حركتج هذي منتي كفو حتى سوق واجف!!!
يلا نرد البيت يالله يالله بلا سوق بلا خرابيط كبتاتكم غاصه بالملابس
روحوا اتبرعوا فيها ما صارت فلوس ...!!! بنك انا !!!..

.وجـيــــــــور للبيت!!

حشري يتدخل بسوالف الحريم وعسى ما تكلمين بالتلفون لازم تعطينه التفاصيل امج اختج خالتج شنو ريوقكم زيتون اخضر والا اسود ..!!
فاضي ومسوي روحه قاضي لا يقعد عندج بالبيت ما يخلي قنفه ما يحركها ما يخلي صورة ما يعيب عليها توه يتذكر الألوان وترتيب البيت وطبعا كله انتي ما تفهمين شي واهو مظلوم وياج

هذا ميووت على الخفيف وجنه العيد
يهذر لين يسكت بروحه روحي خلصي شغلج وتلاقينه بعد ما خلص سوالف اذا ما لحقج المكان الي انتي فيه !!

الحقران يقطع المصران
مثل يقا ل الى

الأبناء

يا الله يا الحنه مو طبيعيه
يماااااا ابي لابتوب يما خويلد عنده انا ما عندي
يماااااا ابي لابك بيري شيخوه عندها انا ماعندي
اخذيهم السوق وياج
ووووع ( لا يعه جبدها ) يمه صج رجعية ما عندج ذوق شخباري انتي من هني سوق شرق
خلاص يما الناس اتيب بضاعته من دبي
عيل حصيصه الدقمه تلبس مناك وانا لا
وانتي تدورين الرخيص والماركات شفتيها كلها من الصين وبنغلاديش
البلوزة 14 دينار وجوتي عزكم الله 44 دينار !!
وحنه ورنه لين تلبين كل الطلبات

والا ما ترتاحين
لا بأكل
لا بشرب
لا بنومة ظهر ولا ليل

تنحاشين من البيت جنج سيلانية لامه بكشتها !!

هذيل ميووووت بسيط ولا جنه يدري ... طاف
عطيه مصروف يتكفل بنفسه وخلاص وفكي نفسج

الحقران يقطع المصران

تقال الى

الخدامه

ماما مافي طماط ... مافي بطاط مافي كلوروكس

مافي صابون مافي كلينكس .. مافي ماي ..
مافي دياي ..مافي دهن ..مافي فيمتو ( قرب رمضان)
مافي صحون ..مافي قلاص كله تكسر
ماما مافي زوج .....!!!

نحشت حتى الريال.. غبره عليهم !!!

طبعا هذا وانتي تجيلين كل اسبوعين وقبل لا يخلص الاسبوع الثاني بدت بوادر العازة وصاح ولدج الصغير

الثلاجة مافيها شي ليش احنا فقراء !!!

والخدامه كانت تسرب الماجلة للسواق برا ويا حليب التموين البودر
قفلي كل شي وحطي ورقه وقلم علقيهم على الثلاجة

او ميووووت خفيف وعلى المطار ولا جنها تدري...

الحقران يقطع المصران
تقال إلى

السائق ...

عسى ما تروحين السوق وتشترين غرض من الجمعية ماما انا يبي معاش قبل المعاشات لا تنزل !!!
اول شهر زين
ثاني شهر يخز
ثالث شهر ياشر بيده
رابع شهر يسولف
سنة يرادد بالحجي
سنتين يصفط السيارة وينزلج على الخط السريع .( ..عادي فري كويت )
طبعا طول الطريج واهو قرقه ما يخلص
ما تعرفين منو باق من و
منو صرخ على منو
يطلع البيت مو زين
وبابا مو زين وماما مو زينه
وسبحان الله ما تطلع بلاوي الخدم إلا لا سافروا

ليش تدوخين راسج

ميوووووت بالسياره بصرخة ولا كلمة ....وانتهينا او تذكره روحة بلا رده بس عاملوهم بالحسنى لكن بحزم

الحقران يقطع المصران ... مثل يقال إلى

                          

واحد او وحده مأذينك

اذا بغى منك شي

اتصالات من الفجر غلى الفجر الثاني لين ترد عليه واذا مارديت اخذ مسجات ( يربح من وراه الاتصالات) .. واذا ما فاد طق سيارته سلف ووصلك ليه باب البيت او يدش الديوانية او يطب عليك بالقهوة او حتى بالنادي ودك تصكه بكيلو الحديد الي انت شايله على راسه وانت ما صدقت تضبط فيه هالعضلتين واهو خرب عليك

هذا تيوده بربعه وتنام فيه
تالي تكسر تلفونه وتقوله فارج .( مو صج اتغشمر)
شوفه شيبي منك لأنك ماراح تفتك من حنته
وخلص عمرك وتالي

ميوووت طويل الأمد ..

                           

او واحد او وحده

عيزت وانت تسفهه او تسفهها من كثر التفاهة من كثر الغباء وحركات الاستعباط من كثر الملاقة الي مال امها داعي والفذلكة الزايده واخيه لو طلعت من اهل الي حابس حابس ... شيفكنا يبي لنا شيخ يقرا علينا وعلى مكانا شيطلعها الجن يطلع واهي مرابطه واهي او اهو لا يستوعب
لا تستحي
لا تنتخي
لا تسوعب لا تفهم ولا يفهم انه غير مرغوب فيه وانك فوق كل هالسخافات .. هذا او هذي
انت من نفسك معطي طاف كبير ...
بدل تلفونك شفر رسايلك
فرمت جهازك
وخلصنا

ميوووووووووت اصلي نفس الوندوز وطااااااااااااااااااف عود . ؟؟ وتسلملي على الصابونه ...

وفعلا
======

الحقران يقطع المصران ....